Ghazals

 

غزلِ امیر مینائی

مرے بس میں یا تو یا رب، وہ ستم شعار ہوتا

یہ نہ تھا تو کاش دل پر مجھے اختیار ہوتا

پسِ مرگ کاش یوں ہی، مجھے وصلِ یار ہوتا

وہ سرِ مزار ہوتا، میں تہِ مزار ہوتا

ترا میکدہ سلامت، ترے خم کی خیر ساقی

مرا نشہ کیوں اُترتا، مجھے کیوں‌ خمار ہوتا

مرے اتّقا کا باعث، تو ہے میری ناتوانی

جو میں توبہ توڑ سکتا، تو شراب خوار ہوتا

میں ہوں‌ نامراد ایسا کہ بلک کے یاس روتی

کہیں پا کے آسرا کچھ جو امیدوار ہوتا

نہیں پوچھتا ہے مجھ کو، کوئی پھول اس چمن میں

دلِ داغدار ہوتا تو گلے کا ہار ہوتا

وہ مزا دیا تڑپ نے کہ یہ آرزو ہے یا رب

مرے دونوں پہلوؤں میں، دلِ بے قرار ہوتا

دمِ نزع بھی جو وہ بُت، مجھے آ کے مُنہ دکھاتا

تو خدا کے منہ سے اتنا نہ میں شرم سار ہوتا

نہ مَلَک سوال کرتے، نہ لَحَد فشار دیتی

سرِ راہِ کوئے قاتل، جو مرا مزار ہوتا

جو نگاہ کی تھی ظالم، تو پھر آنکھ کیوں چُرائی

وہی تیر کیوں نہ مارا، جو جگر کے پار ہوتا

میں زباں سے تم کو سچّا، کہو لاکھ بار کہہ دُوں

اسے کیا کروں کہ دل کو نہیں اعتبار ہوتا

مری خاک بھی لَحَد میں، نہ رہی امیر باقی

انہیں مرنے ہی کا اب تک، نہیں اعتبار ہہوتا

_____________________________

وہ دل نواز ہے لیکن نظر شناس نہیں 

مرا علاج مرے چارہ گر کے پاس نہیں 

تڑپ رہے ہیں زباں پر کئی سوال مگر 

مرے لیے کوئی شایان التماس نہیں

 

ترے جلو میں بھی دل کانپ کانپ اُٹھتا ہے 

مرے مزاج کو آسودگی بھی راس نہیں 

کبھی کبھی جو ترے قرب میں گزارے تھے 

اب ان دنوں کا تصور بھی میرے پاس نہیں

 

گزر رہے ہیں عجب مرحلوں سے دیدہ و دل 

سحر کی آس تو ہے زندگی کی آس نہیں 

مجھے یہ ڈر ہے تری آرزو نہ مٹ جائے 

بہت دنوں سے طبیعت مری اداس نہیں

() ناصر کاظمی ()

____________________________

کوئی رنجش مری ذاتی نہیں ہے

یہ دنیا راس بس آتی نہیں ہے

امیدیں ہیں تو ہیں ساری خزاں سے

بہار اچھی خبر لاتی نہیں ہے

بھروسہ خار پر ہے گل کی نسبت

کہ اس کی خو بدل پاتی نہیں ہے

سمجھ آئی ہے جب سے اس جہاں کی

کوئی شے اک نظر بھاتی نہیں ہے

تو اپنے خواب میں کیا دیکھتا ہے

ہمیں تو نیند اب آتی نہیں ہے

سرہانے رات میرے جاگتی ہے

اندھیرا ہی مرا ساتھی نہیں ہے

اندھیروں کو بھلا اب کوسنا کیا

دیے میں جب ترے باتی نہیں ہے

تھکن سے چور ہے خود نا خدا بھی

یہ کشتی ڈوب کیوں جاتی نہیں ہے

نہ جانے زندگی کیا شے ہے ابرک

کہ خواہش دل ہی سے جاتی نہیں ہے

(اتباف ابرک)

____________________

قصے پُرنم نہیں رہے اس میں 

جب ترے غم نہیں رہے اس میں

آپ کس دل کی بات کرتے ہیں

اب وہ عالم نہیں رہے اس میں

غمِ دوراں سے دل ہے یوں بہلا

تیرے ماتم نہیں رہے اس میں

اب تو کردار داستاں کے کہیں

آپ کچھ جم نہیں رہے اس میں

مانتا ہوں وجود ہے باقی

اب مگر ہم نہیں رہے اس میں

سچ یہ ہے ، جسم بھی ہے تھکنے لگا

ہم بھی تو کم نہیں رہے اس میں

ہر ضرورت کہے نچوڑو اسے

تھوڑا بھی دم نہیں رہے اس میں

آنکھ نے دیکھی ہے حیات ابرک

اشک اب تھم نہیں رہے اس میں

اتباف ابرک

_______________________

حرفِ رنجش پہ کوئی بات بھی ہو سکتی ہے

عین مُمکن ہے، مُلاقات بھی ہو سکتی ہے

زندگی پُھول ہے، خوشبو ہے، مگر یاد رہے!

زندگی، گردشِ حالات بھی ہو سکتی ہے

ہم نے یہ سوچ کے رکھّا ہے قدم گُلشن میں !

لالہ و گُل میں تِری ذات بھی ہوسکتی ہے

چال چلتے ہُوئے، شطرنج کی بازی کے اُصول !

بُھول جاؤ گے، تو پھر مات بھی ہوسکتی ہے

ایک تو چھت کے بِنا گھر ہے ہمارا

اُس پہ یہ خوف ، کہ برسات بھی ہو سکتی ہے

محسن نقوی

____________________________

دیپ  جلتا  ھے  نہ آتی  ھے  صدا  شام  ڈھلے

بھیگ جاتی ھے مِرے گھر کی فضا شام ڈھلے

اب اُسے رات کے صحراؤں میں کرتا ہوں تلاش

جس نے اِک دِن مُجھے ملنے کو کہا، "شام ڈھلے"

بس اسی آس پہ ھم تا بہ سحر جاگتے ھیں

آسمانوں   سے  اُترتا   ھے  خُدا   شام  ڈھلے

وقتِ رُخصت  تیرا  چہرہ نہیں  دیکھا جاتا

خامُشی  سے  کبھی ہو جانا  جُدا شام ڈھلے

آندھیاں رُک کے ادا کرتی ھیں چلنے کا خراج

جب بھی جلتا ھے  کوئی ٹُوٹا  دِیا شام ڈھلے

ورنہ سُورج کی طرح میں بھی کہیں ڈَھل جاتا

روک  لیتی  ھے ،  مُجھے  میری  انا  شام  ڈھلے

جب بھی گرتے ھیں‌ رگِ جاں میں سُلگتے آنسو

 دم بخود  دیکھتی  رہتی  ھے  ہوا  شام  ڈھلے

اِس طرح  اُس کو  لگی  شہرِ جدائی  کی ہوا

جیسے لگتی ھے کسی ماں کی دُعا شام ڈھلے

✍احمد حماد

__________________________

جستجو میں تیری پھرتا ہوں نجانے کب سے؟

آبلہ پا ہیں مرے ساتھ زمانے- کب سے!

میں کہ قسمت کی لکیریں بھی پڑھا کرتا تھا

کوئی آیا ہی نہیں ہاتھ دکھانے کب سے

نعمتیں ہیں نہ عذابوں کا تسلسل اب تو!

مجھ سے رُخ پھیر لیا میرے خدا نے کب سے

جان چھٹرکتے تھے کبھی خود سے غزالاں جن پر

بھول بیٹھے ہیں شکاری وہ نشانے کب سے

وہ تو جنگل سے ہواؤں کو چُرا لاتا تھا

اُس نے سیکھے ہیں دیے گھر میں جلانے کب سے؟

شہر میں پرورشِ رسمِ جنوں کون کرے؟

یوں بھی جنگل میں یاروں کے ٹھکانے کب سے؟

آنکھ رونے کو ترستی ہے تو دل زخموں کو

کوئی آیا ہی نہیں احسان جتانے کب سے

جن کے صدقے میں بسا کرتے تھے اُجڑے ہوئے لوگ

لُٹ گئے ہیں سرِ صحرا وہ گھرانے کب سے

لوگ بے خوف گریباں کو کُھلا رکھتے ہیں

تِیر چھوڑا ہی نہیں دستِ قضا نے کب سے

جانے کب ٹوٹ کے برسے گی ملامت کی گھٹا؟

سر جھکائے ہوئے بیٹھے ہیں دِوانے کب سے

جن کو آتا تھا کبھی حشر جگانا محسؔن

بختِ خفتہ کو نہ آئے وہ جگانے کب سے!

محسن نقوی

_________________________________

مدہوش تیری آنکھیں بے مثال تیری آنکھیں

محبوب تو کیا جانے ہیں کمال تیری آنکھیں

تیری آنکھوں کے سوا دنیا میں رکھا کیا ہے؟

گلاب آنکھیں شراب آنکھیں

یہی تو ہیں لاجواب آنکھیں

انہیں میں الفت انہیں میں نفرت

سوال آنکھیں عذاب آنکھیں

کبھی نظر میں بلا کی شوخی

کبھی سراپا حجاب آنکھیں

کبھی چھپاتی ہیں راز دل کے

کبھی ہیں دل کی کتاب آنکھیں

کسی نے دیکھیں تو جھیل جیسی

کسی نے پائ شراب آنکھیں

وہ آۓ تو لوگ مجھ سے بولے

حضور آنکھیں جناب آنکھیں

عجب تھا گفتگو کا عالم

سوال کوئ جواب آنکھیں

یہ مست مست بے مثال آنکھیں

نشے سے ہر دم نڈھال آنکھیں

اٹھیں تو ہوش و حواس چھینیں

گریں تو کر دیں کمال آنکھیں

کوئ ہے انکے کراہ کا طالب

کسی کا شوق وصال آنکھیں

نہ یوں جلیں نہ یوں ستائیں

کریں تو کچھ یہ خیال آنکھیں

ہیں جینے کا اک بہانہ یارو

یہ روح پرور جمال آنکھیں

درّاز پلکیں وصال آنکھیں

مصوری کا کمال آنکھیں

شراب رب نے حرام کر دی

مگر کیوں رکھی حلال آنکھیں

ہزاروں ان سے قتل ہوۓ ہیں

خدا کے بندے سمبھال آنکھیں

______________________